Ráðgjöf

Fyrir hverja er ráðgjöf?

• Ráðgjöf getur hentað fyrir þá einstaklinga sem hafa misst yfirsýn yfir fjárhagsstöðu sína og vilja öðlast betri sýn á stöðuna.
• Ráðgjöf getur hentað fyrir þá einstaklinga sem glíma við greiðsluerfiðleika og vita ekki hvernig skal bregðast við þeim.  Einnig þá sem hafa árangurslaust reynt samninga við kröfuhafa.
• Ráðgjöf getur hentað fyrir þá einstaklinga sem sjá fram á að fjárhagsstaða þeirra versni og vilja bregðast við áður en í óefni er komið.

Hvernig er sótt um?

• Sótt er um aðstoð vegna fjárhagsvanda rafrænt, notast þarf við rafræn skilríki eða íslykil.
• Við umsókn sækir umboðsmaður skuldara upplýsingar um tekjur, eignir og skuldir.
• Umsækjandi þarf sjálfur að veita upplýsingar um útgjöld sín vegna framfærslu.
• Hjón og fólki í sambúð er heimilt að sækja um í sameiningu.

 Hvernig fer ráðgjöf fram?

• Ráðgjafi aðstoðar umsækjendur að þeirra ósk og með þeirra leyfi.
• Ráðgjafi gerir greiðsluerfiðleikamat sem sýnir tekjur og framfærslukostnað, eignir og skuldir ásamt greiðslugetu.
• Ráðgjafi leggur til úrlausnir og tillögur byggðar á greiðsluerfiðleikamatinu.
• Ef frjálsir samningar við kröfuhafa eru mögulegir þá getur ráðgjafi haft milligöngu um slíka samninga, að höfðu samráði við umsækjendur.
• Ef frjálsir samningar eru ekki mögulegir eru aðrar leiðir kannaðar sem gætu gagnast við lausn á vanda.

Þátttaka umsækjanda í ferlinu

Samskipti og samtöl við umsækjendur eru mikilvægur liður í ráðgjöfinni. Slík samtöl fela að öllu jöfnu í sér eftirfarandi:

• Virka hlustun þegar umsækjandi greinir frá þeim vandamálum sem hann glímir við.
• Fyrirspurnir ráðgjafa um stöðu, m.a. um félagslega stöðu, tekjur, atvinnu, lífeyri, búsetu, útgjöld o.fl.
• Upplýsingagjöf um möguleg úrræði vegna greiðsluerfiðleika.
• Upplýsingagjöf um úrræði embættisins – ráðgjöf, greiðsluaðlögun, fjárhagsaðstoð til greiðslu skiptakostnaðar og upplýsingar um hvað þessi úrræði fela í sér og afleiðingar þeirra.
• Í samtalinu er leitast við að upplýsa umsækjanda um möguleika hans þannig að hann öðlist raunhæfar væntingar um lausn sinna mála.

Öll samskipti við umsækjanda eru skráð.

Úrlausnir og tillögur

• Niðurstaða ráðgjafar getur falið í sér:
• Tillögu um greiðslu krafna.
• Tillögu um frestun á greiðslum.
• Aðstoð við að sækja um greiðslufrestun hjá ÍLS.
• Skriflegar leiðbeiningar um önnur úrræði embættisins.
• Milligöngu um samninga við kröfuhafa.
• Aðstoð við að óska eftir lækkun á mánaðarlegum afborgunum, t.d. með lengingu lánstíma.
• Aðstoð við að óska eftir lækkun á dráttarvöxtum og innheimtukostnaði á kröfum.
• Aðstoð við að yfirfara mánaðarleg útgjöld.

Ráðgjöf umboðsmanns skuldara felur ekki í sér:

• Lögfræðilega ráðgjöf.
• Aðstoð við að sækja um lán.
• Leiðbeiningar um hvar skuli sækja um endurfjármögnun og með hvaða kjörum.
• Samninga  um algjöra eftirgjöf á kröfum.
• Könnun á gildi ábyrgðarskuldbindinga.
• Aðstoð við að telja fram til skatts.
• Lánveitingu til greiðslu skulda.